disalbe Right click

Monday, October 31, 2016

நீங்கள் வாங்கிய நிலத்தில் வீடு கட்ட முடியுமா


நீங்கள் வாங்கிய நிலத்தில் வீடு கட்ட முடியுமா? என்ன செய்ய வேண்டும்?

சிஎம்டிஏ, டிடிசிபி அலுவலகங்களில் விண்ணப்பித்து நிலம், கட்டிட அனுமதி விவரங்களை அறியலாம்:
ரியல் எஸ்டேட் துறையினர் தகவல்
பொதுமக்கள் தாங்கள் வாங்கிய நிலம், கட்டிடத்துக்கான அனுமதி உள்ளதா என்பதை சிஎம்டிஏ அல்லது டிடிசிபி அலுவலகங்களில் நேரடியாக விண்ணப்பித்து தெரிந்து கொள்ளும் வசதி உள்ளது.
விவசாய நிலங்களை வீட்டு மனைகளாக மாற்றவும், அங்கீகாரம் இல்லாத மனைப் பிரிவுகள் அல்லது கட்டிடங்களை பத்திரப்பதிவு செய்யவும் தடை விதித்து சென்னை உயர் நீதிமன்றம் உத்தரவிட்டது.
நீதிமன்ற உத்தரவைத் தொடர்ந்து, பொதுமக்கள் தற்போது தாங்கள் வாங்கிய நிலத்தின் அனுமதி தொடர்பாக சிந்திக்கத் தொடங்கியுள்ளனர். அவர்கள், தங்கள் நிலம் தொடர்பான ‘லே-அவுட்’-க்கு யார் அனுமதியளித்துள்ளனர் என்பதை தேட வேண்டிய நிலைக்கு தள்ளப்பட்டுள்ளனர்.
பொதுவாக சென்னை மற்றும் சென்னையை ஒட்டிய பகுதி என்றால் சென்னை பெருநகர வளர்ச்சிக் குழுமம் (சிஎம்டிஏ) அந்த ‘லே அவுட்’ டை அங்கீகரித்திருக்க வேண்டும். மற்ற பகுதிகள் என்றால், நகர ஊரமைப்பு திட்ட இயக்ககம் (டிடிசிபி) அங்கீகாரம் இருக்க வேண்டும்.
இவற்றை எப்படி அறிந்து கொள்ளலாம் என்பது தொடர்பாக, தமிழ்நாடு வீடு, அடுக்குமாடி குடியிருப்பு கட்டுவோர் சங்கங்களின் கூட்டமைப்பு மாநில தலைவர் டி.மணிசங்கர் கூறியதாவது:
நிலம் அல்லது வீட்டை சென்னைக்கு உட்பட்ட பகுதியில் வாங்கினால், அதற்கான ஆவணத்துடன், இந்த நிலம் அல்லது கட்டிடம் தொடர்பான அனுமதி விவரங்களை அளிக்கக்கோரி, சிஎம்டிஏ-வுக்கு விண்ணப்பிக்க வேண்டும்.
அவர்கள் அதில் குறிப்பிடப்பட்டுள்ள, ஆவண எண், ஆவணத்தை சரிபார்த்து அனுமதி தொடர்பான விவரங்களை தெரிவிப்பார்கள். உடனடியாக தெரிய வேண்டும் எனில் வாய்மொழியாக விவரங்களை அளிப்பார்கள்.
எழுத்துப் பூர்வமாக வேண்டும் எனில், 30 நாட்களுக்குள் அளிப்பார்கள். அதில், அந்த ‘லே அவுட்’ அல்லது குடியிருப்பு அனுமதி பெற்றதா, அனுமதிக்கப்பட்ட அளவில் உள்ளதா என்பதை அறியலாம்.
சென்னைக்கு வெளியில் உள்ள மற்ற பகுதிகளுக்கான அனுமதி விவரங்களை டிடிசிபி அலுவலகத்தில் இருந்து பெற முடியும். சாதாரண பொதுமக்கள் இவற்றை பார்ப்பதில்லை. காலதாமதமாகும் என அலுவலர்கள் தெரிவித்தால், நிலத்தை விற்பவர் அவசரம் காட்டுவார்கள்.
அப்போது, நிலத்தை வேறு யாராவது வாங்கிவிடுவார்கள் என அவசரப்பட்டு, பதிவு செய்கின்றனர். இது தொடர்பாக, அரசும் பொதுமக்களுக்கு அறிவுறுத்துவதில்லை.
மேலும், தற்போது தொழில்நுட்பம் வளர்ந்துவிட்டது. அடுக்குமாடி கட்டிட வரைபட அனுமதிக்கு ஆன்லைனில் விண்ணப்பிக்க கூறும் அமைப்புகள், அது தொடர்பான விவரங்களை ஆன்லைனில் பார்த்துக்கொள்ளும் வசதியை அளிப்பதில்லை.
தற்போதைய சூழலில் சிஎம்டிஏ மற்றும் டிடிசிபி அனுமதி தொடர்பான விவரங்களை சம்பந்தப்பட்ட துறைகளின் இணையதளத்தில் பார்க்க முடியாது. அரசு வெளிப்படையாக இந்தத் தகவல்களை தெரிவிக்க முன்வர வேண்டும்.
மேலும், நிலத்தை மேம்படுத்துவோர், அதற்கான ‘லே அவுட்’ அனுமதி பெறும் போது, சாலை உள்ளிட்ட அடிப்படை கட்டமைப்பு வசதிக்காக அரசுக்கு குறிப்பிட்ட தொகையை செலுத்த வேண்டும். அந்தத் தொகையில், அரசு சாலை, குடிநீர், கழிவுநீர் அமைப்புகளை உருவாக்க வேண்டும். ஆனால், அரசு அதை உடனடியாக செய்வதில்லை. இதனால் எதிர்காலத்தில் பிரச்சினை ஏற்படுகிறது.
இதை தவிர்க்க, நிலத்தை மேம்படுத்துபவரே இந்த வசதிகளை செய்து அளித்தால் அனுமதிப்பதாக அறிவிக்கலாம்.
இவ்வாறு அவர் தெரிவித்தார்.
இதற்கிடையில் தற்போது, கட்டிட வரைபடம் அனுமதியை விரைவாக அளிப்பதற்கான முயற்சியில் சிஎம்டிஏ ஈடுபட்டுள்ளது.
இது தொடர்பாக நகர்ப்புற வளர்ச்சித்துறை அதிகாரி ஒருவர் கூறுகையில், ‘‘சிஎம்டிஏ-வில் திட்ட அனுமதி விண்ணப்ப பரிசீலனைக்கான தானியங்கி மென்பொருள் ‘ஏபிபிஏஎஸ்’ உருவாக்கப்பட்டுள்ளது. இதன் மூலம் சிறப்பு கட்டிடங்கள், மிகப்பெரிய அடுக்குமாடி கட்டிடங்களுக்கான அனுமதியை வெளிப்படையாக வழங்க முடியும்.
‘லே-அவுட்’ அனுமதியை பொறுத்தவரை, பொதுமக்கள் இடத்தை வாங்கும் முன், வரைபடத்தில் அளிக்கப்பட்டுள்ள அனுமதி எண், ஆவணங்களுடன் விண்ணப்பம் அளித்து விவரங்களை தெரிந்துகொள்ளலாம்’’ என்றார்.

கி.கணேஷ்

நன்றி : தி இந்து தமிழ் நாளிதழ் – 01.11.2016



வங்கிக் கணக்கில் இருந்து பணம் திருடு போகாமலிருக்க


வங்கிக் கணக்கில் இருந்து பணம் திருடு போகாமலிருக்க
என்ன செய்ய வேண்டும்?

வாடிக்கையாளர்கள் வங்கி கணக்குகளில் இருந்து டெபிட் கார்டு மூலம் சமீபத்தில், பல கோடி பணம் சுருட்டப்பட்ட சம்பவம் இந்தியாவில் பரபரப்பை ஏற்படுத்தியது.

 இவ்வாறு பணம் திருடுவதில் ஹேக்கர்களுக்கு உங்கள் பேஸ்புக் அக்கவுண்ட் முக்கிய கருவியாக பயன்படுகிறது.

பேஸ்புக்கில் குறிப்பிடப்பட்டுள்ள பிறந்த நாள் தினம், மற்றும் உங்கள் செல்போன் எண் இந்த திருட்டின் மூல காரணம். 

சமீபத்தில் சைபர் கிரைம் போலீசார் எடுத்த ஆய்வில், 75 சதவீதம் சைபர் குற்றவாளிகள், படித்த இளைஞர்களாகவே இருக்கின்றனர் என்று தெரியவந்துள்ளது. எந்த இணையதளத்தை எப்படி முடக்கலாம் என்பது இவர்களுக்கு அத்துப்படியாம். 

மோசடி நடப்பது இப்படித்தான்: பேஸ்புக் கணக்கை ஹேக் செய்யும் சைபர் குற்றவாளிகள் அதில் இருந்து, பிறந்த தேதி, செல்போன் நம்பர், பெயரை எடுத்துக்கொள்வார்கள். 

செல்போன் திருடுபோனதாக போலீஸ் நிலையத்தில் புகார் அளிப்பார்கள். காவல் நிலையத்தில் ஒரு எப்.ஐ.ஆரை பெற்று, புதிய சிம்கார்டுகளை உங்கள் செல்போன் நம்பரில் பெறுவார்கள். 

அதை வைத்து உங்கள் ஆன்லைன் வங்கி கணக்கை திறப்பார்கள். பேஸ்புக் தகவலை வைத்து போலியான பான் கார்டு பெற்று, ஆன்லைன் வங்கி கணக்குகளை முடக்குவார்கள். 

வங்கி ஆன்லைன் பாஸ்வேர்ட் மறந்துவிட்டதாக கூறி, புதிய பாஸ்வேர்ட் கேட்பார்கள். வங்கிகள் வாடிக்கையாளரின் செல்போன் எண்ணுக்கு அனுப்பும் பாஸ்வேர்ட் ரீ-செட்டிங் பார்மட்டை கொண்டு புது பாஸ்வேர்டை உருவாக்குவார்கள். 

பிறகு என்ன..? உங்கள் வங்கி கணக்கிலிருந்து ஆன்லைன் மூலமாக பணி பரிமாற்றத்தை எளிதாக முடித்துவிடுவார்கள். 

இந்த பிரச்சினையை தீர்க்க பேஸ்புக்கில் உங்கள் பிறந்த நாள், தேதி, வருடம், செல்போன் எண் போன்றவற்றை பதிவிடுவதை தவிருங்கள்.

By: Veera Kumar
நன்றி: ஒன்இந்தியா  » தமிழ்  » செய்திகள்  »  31.10.2016

இளைஞர்களுக்கு வேலைவாய்ப்பு


இளைஞர்களுக்கு வேலைவாய்ப்பு - என்ன செய்ய வேண்டும்?
வீடுகளுக்கு இணையதள இணைப்பு: இளைஞர்களை தொழில்முனைவோராக்கும் அரசு கேபிள் நிறுவனம்- வங்கிக்கடன் பெற்றுத்தரவும் திட்டம்
தமிழகம் முழுவதும் தனியார் நிறுவனங்களுக்குப் போட்டியாக வீடுகளுக்கு குறைந்த கட்டணத்தில் இணையதள இணைப்பு வழங்கும் திட்டத்தில், இளைஞர்களைத் தொழில்முனைவோராக்கும் முயற்சியில் அரசு கேபிள் டிவி நிறுவனம் இறங்கியுள்ளது. இதற்கு வங்கிக்கடன் வசதியையும் செய்துதர திட்டமிட்டுள்ளது.
தமிழக அரசின் தகவல் தொழில்நுட்பத் துறையின்கீழ் அரசு கேபிள் டிவி நிறுவனம் இயங்கி வருகிறது. தற்போது அரசு கேபிள் டிவி நிறுவனத்துக்குத் தமிழகம் முழுவதும் 73 லட்சம் கேபிள் இணைப்புகள் உள்ளன.
அரசு கேபிள் டிவி நிறுவனம் கேபிள் இணைப்புகள் வழங்குவதுடன், தமிழகம் முழுவதும் மாவட்ட ஆட்சியர், மாநகராட்சி அலுவலகங்களில் அரசு இ-சேவை மையங்களை அமைத்து, அவற்றின் மூலம் பொதுமக்களுக்கு வருவாய்த் துறை உள்ளிட்ட துறைகளிடம் இருந்து வழங்கப்படும் சான்றுகள், அரசின் நலத்திட்டங்களுக்கு விண்ணப்பித்தல், வாக்காளர் அடையாள அட்டை அச்சிட்டு வழங் குதல் ஆகிய பணிகளைச் செய்து வருகிறது. சமீபத்தில் கூடுதலாக, ஆதார் பதிவுக்கான வசதியையும் தமிழ்நாடு அரசு கேபிள் டிவி நிறுவனம் பெற்றுள்ளது.
இந்நிலையில் தற்போது தனியார் இணைய சேவை நிறு வனங்களுக்குப் போட்டியாக அரசு கேபிள் டிவி நிறுவனமும் பொது மக்களுக்கு இணைய இணைப்பு வழங்கும் திட்டத்தில் இறங்கியுள் ளது. இதற்காக அரசு கேபிள் டிவி நிறுவனம் ஒப்பந்தப்புள்ளி வெளி யிட்டு, தனியாரான ‘வோடபோன்’ நிறுவனத்துடன் கைகோத்துள்ளது. இந்த நிறுவனத்தின் உயர்நிலை இணைப்பைப் பெற்று பொதுமக்களுக்கு வழங்குகிறது.
இது தொடர்பாக அரசு கேபிள் டிவி நிறுவன மேலாண் இயக்குநர் ஜெ.குமரகுருபரன் ‘தி இந்து’விடம் கூறியதாவது:
இந்த ஆண்டு மார்ச் மாதம் முதல்வர் அரசு கேபிள் டிவியின் இணைய இணைப்புத் திட்டத்தைத் தொடங்கி வைத்தார்.
அவர் தொடங்கி வைக்கும் முன்னரே, நாங்கள் இதற்கான பணிகளில் இறங்கி, ஆயிரத்து 300 இணைப்புகளைக் கைவசம் வைத்திருந்தோம். இதற் கான தொலைத்தொடர்பு அனு மதியும் முறையாக பெறப்பட்டுள் ளது.
முதலில், அரசு கேபிள் நிறுவன ஆபரேட்டர்கள் மூலம் இத்திட்டத் தைச் செயல்படுத்த முயற்சி எடுத் தோம்.
அவர்கள் முதலில் இத்திட் டத்துக்கான பைபர் ஆப்டிக்கல் கேபிள், இணைய இணைப்பை பிரித்தளிக்கும் தளவாடப் பொருட்களை வாங்க வேண்டும். அதற்கு ஒருவருக்கு குறைந்தபட்சம் ரூ.5 லட்சம் வரை செலவாகும்.
ஆனால், ஆபரேட்டரின் அலுவ லகம் வரையிலான இணைப்பை அரசு கேபிள் டிவி நிறுவனமே சொந்த செலவில் வழங்கும் என தெரிவித்திருந்தோம். அதன்படி 32 பேர் மட்டுமே இத்திட்டத்தில் இணைந்து, பொதுமக்களுக்கு இணையதள இணைப்புகளை வழங்கினர்.
அப்போது சட்டப்பேரவைத் தேர்தல் அறிவிப்பு வெளியானது. அதனால், திட்டத்தை முழுமை யாக செயல்படுத்த முடியவில்லை. தேர்தல் முடிந்து மீண்டும் அரசு பொறுப்பேற்றதும், பணிகளைத் தொடங்கினோம். தொடர் முதலீடு, ஆட்கள் நியமனம் போன்றவற்றால் கேபிள் டிவி ஆபரேட்டர்கள் சிரமம் இருப்பதாக தெரிவித்தனர்.
இதையடுத்தே, தொழில் முனைவோராக முயற்சிக்கும் இளை ஞர்கள் மூலம் இத் திட்டத்தைத் செயல்படுத்த முடி வெடுத்தோம். தற்போது இதற்கான விளம்பரம் வெளியிடப்பட்டுள்ளது டன், தொழில்முனைவோர் மேம் பாட்டு நிறுவனம் உள்ளிட்ட அரசு நிறுவனங்களுடன் கைகோர்த்துள் ளோம்.
இத்திட்டத்தில் இணைய விரும்பும் இளைஞர்களுக்கு வங்கிக்கடன் ஏற்பாடும் செய்ய முடிவெடுத்துள்ளோம். இத்திட்டத் தில் இணைபவருக்கு பொதுமக் களிடம் இருந்து வசூலிக்கப்படும் கட்டணத் தொகையில் 46 சதவீதம் வழங்கப்படும்.
தற்போது இத்திட்டத்தில் சேர 300-க்கும் மேற்பட்ட இளைஞர்கள் விருப்பம் தெரிவித்துள்ளனர். அவர்களுடன் நாங்கள் பேசி வரு கிறோம். மத்திய அரசின் வட்டார அளவிலான இணையதள திட்டத் தைத் தமிழக அரசு செயல்படுத்தும் என முதல்வர் ஏற்கெனவே கடந்த ஆண்டு அறிவித் திருந்தார் . அத்திட்டத்துக்கான பணிகள் தற்போது நடந்து வருகின்றன. அதற்கு முன் னோடியாக, தற்போது தமிழக அரசே இத்திட்டத்தைச் செயல்படுத்துகிறது.
திட்டத்தில் இணையவும், இணைப்புக்காக வும், பழுது தொடர்பான தகவல் களுக்கும் ‘18004252911’ என்ற இலவச எண்ணில் தொடர்பு கொள்ளலாம். இணைப்பு பெற்றவர்கள் ஆன் லைன் மூலம் கட்டணம் செலுத் தலாம்.
இவ்வாறு அவர் தெரிவித்தார்.
இத்திட்டத்தைப் பொறுத்தவரையில், மாதம் ரூ.299 முதல் ரூ.1,349 மாத கட்டண அடிப்ப டையில், இணைய வேகத்துக்கு ஏற்றவகையில் திட்டங்கள் அறி விக்கப்பட்டுள்ளன. இக்கட்டணம் தவிர, கூடுதல் வரிகள் ஏதும் விதிக்கப்படுவதில்லை என்பதால் வாங்கிப் பயன்படுத்துகின்றனர்.
இணையதள இணைப்பு குறித்து, கேபிள்டிவி தொழில்நுட் பப் பிரிவு நிபுணர் கூறும்போது,
‘‘அரசு இணையதள இணைப்பைப் பொறுத்தவரை, 24 மணி நேரமும் செயல்படும் கட்டுப்பாட்டு அறை உள்ளது.
வாடிக்கையாளர்களின் வீட்டு இணைப்பில் உள்ள தொ ழில்நுட்ப கோளாறுகளை, இங்கு இருந்தபடியே சீரமைக்க முடியும். தற்போது அதற்குத் தேவையான ஆட்கள் நியமிக்கப்பட்டுள்ளனர் .
இணைப்பு அறுபட்டிருந்தால் மட்டுமே, வாடிக்கையாளர்கள் தங்கள் பகுதி முகவரை அணுக வேண்டிவரும்’’ என்றார்.
கி.கணேஷ்
நன்றி : தி இந்து தமிழ் நாளிதழ் - 31.10.2016


Sunday, October 30, 2016

பெண்களுக்கு - சர்க்கரை நோய்


பெண்களுக்கு - சர்க்கரை நோய் - என்ன செய்ய வேண்டும்?

இயந்திரமயமான உலகமே பல்வேறு வகையான வியாதிகள் வருவதற்கு காரணமாகிறது. அதில் முக்கியமானது சர்க்கரை வியாதி.
இதன் தாக்கம் நாளுக்கு நாள் அதிகரித்து வருகிறது. குழந்தைகள், இளைஞர்கள், முதியோர்கள், நடுத்தர வயதினர் என்று எல்லா வயதினருமே சர்க்கரை வியாதியால் பாதிக்கப்படுகிறார்கள்.
கர்ப்ப காலத்தில் ஏற்படும் சர்க்கரை நோய்கள்தான் அதிக பாதிப்பு ஏற்படுத்தும். ஏனெனில், இந்நோய் தாயை மட்டுமின்றி, பிறக்கும் குழந்தையையும் பாதிக்கிறது.
கர்ப்பகால சர்க்கரை நோய், உலக அளவில் 10 சதவீதத்தில் இருந்து 15 சதவீதம் மக்களுக்கு ஏற்படுகிறது.
கர்ப்பகால சர்க்கரை நோய் பாதிப்பு அதிகமாக தாக்கும் வாய்ப்புள்ளவர்கள் யார் தெரியுமா?
1. 30 வயதுக்கு மேல் கர்ப்பம் தரிப்பவர்கள்
2. குழந்தை எடை அதிகமாக இருத்தல்
3. இதற்கு முன்னால் பிறந்த குழந்தையின் எடை 4.1 கிலோ கிராமை விட அதிகமாக இருத்தல்
4. தொடர்ந்து கருச்சிதைவு ஏற்படுதல்
5. கர்ப்பம் தரிக்கும் முன் தாயின் எடை அதிகமாக இருத்தல்
6. தாய், தந்தை மற்றும் சகோதர, சகோதரிகளுக்கு சர்க்கரை நோய் இருத்தல்
7. மருத்துவரின் முதல் சந்திப்பிலே, சிறுநீரில் சர்க்கரை இருத்தல்
8. சினைப்பையில் நீர் கட்டி மற்றும் வளர்சிதை பரும வியாதி ரத்தகொதிப்பு நோய் மற்றும் ஸ்டீராய்டு மாத்திரைகளை எடுத்துக்கொள்ளுதல்
9. அதிக முறை கர்ப்பம் தரித்தல்
மேலே சொல்லப்பட்ட பிரிவில் எந்த வகையில் நீங்கள் இருந்தாலும், மருத்துவரை அணுகி, அதற்குரிய சிகிச்சை எடுத்துக்கொள்ள வேண்டும்.
தடுக்க என்ன செய்ய வேண்டும்
பொதுவாக திருமணம் ஆனவுடன் பெண்களுக்கு உடல் எடை அதிகரிக்க வாய்ப்பு இருக்கிறது. காரணம், உடல் உழைப்பு மற்றும் உடற்பயிற்சி இல்லாமை. எனவே திருமணத்திற்கு முன்பு உடல் பருமன் இல்லாத பெண்கள், திருமணத்திற்கு பிறகும் உடல் பருமன் இல்லாமல் பார்த்துக் கொள்ள வேண்டும்.
திருமணத்திற்கு பின்னும் உடல் எடை அதிகரித்து விட்டால், உடல் எடையை குறைத்துவிட்டு கர்ப்பம் தரிக்க வழிவகுக்க வேண்டும்.
திருமணத்திற்கு பின் பெண்கள் பாத்திரம் கழுவுதல், வீடு கூட்டுதல், சின்ன சின்ன வீட்டு வேலைகளை யாருடைய உதவியும் இல்லாமல் செய்ய வேண்டும்.
தாமாகவே வீட்டு வேலை பார்த்தால் நிச்சயமாக உடல் பருமனை குறைக்க முடியும்.
அதேபோல், திருமணத்திற்கு முன்னும், பின்னும் மற்றும் கர்ப்பம் தரிக்கும் முன்னும், பின்னும், உடற்பயிற்சி செய்வதன் மூலம் சர்க்கரை நோய் வராமல் தடுக்கலாம்.
எனவே நம் நாட்டு பெண்கள் கவனிக்க வேண்டியது தகுந்த உடற்பயிற்சி மற்றும் உணவு கட்டுப்பாடு, கர்ப்ப கால சர்க்கரை நோய் வருவதை தடுப்பது மட்டுமின்றி, நீங்கள் அரும்பாடுபட்டு பெற்றெடுக்கும் உங்கள் குழந்தைக்கும் சர்க்கரை நோய் வராமல் தடுக்கலாம். பெருகி வரும் கர்ப்பக்கால சர்க்கரை நோய், கர்ப்ப காலத்தில் பல விளைவுகளை ஏற்படுத்துகிறது.
விளைவுகள் என்ன?
கர்ப்ப காலத்தில் சர்க்கரை நோய் ஏற்பட்டால், கர்ப்பிணிகளுக்கு ரத்தகொதிப்பு, கருச்சிதைவு, மூச்சு முட்டல், கால் வீக்கம், தலைவலி போன்ற பிரச்னைகளும் வரும் வாய்ப்புகள் அதிகம்.
சில நேரங்களில் சிறுநீரக தொற்று மற்றும் பிறப்புறுப்பில் கிருமிகள், வெள்ளைப்படுதல், அரிப்பு ஏற்படும். கர்ப்ப காலத்தில் வலிப்பு நோய் ஏற்பட வாய்ப்பு உண்டு.
குழந்தைக்கு பிறவி நோய்களும், தண்டுவடம் மற்றும் சில வகை இருதய மற்றும் நரம்பு கோளாறுகளும் ஏற் படும் வாய்ப்பு உண்டு.
கர்ப்ப கால சர்க்கரை நோய் உள்ள தாய்மார்கள் அதிக எடையுள்ள குழந்தைகளை சுமப்பதால் பிரசவ கோளாறுகள் பிரசவத்தின்போது ஏற்பட வாய்ப்பு உண்டு.
சுகப்பிரசவம் ஏற்படும் வாய்ப்புகள் மிகக்குறைவு.
பெரும்பாலும் அறுவை சிகிச்சை முறைகள் குழந்தையை வெளிக் கொணர வேண்டிய கட்டாயம் ஏற்படும்.
சர்க்கரை நோயை அறியலாம்
மிகச்சிறிய ரத்த பரிசோதனை மூலம் கர்ப்ப கால சர்க்கரை நோயை அறியலாம்.
*50 கிராம் குளுக்கோஸை நீரில் கலந்து அருந்திவிட்டு, ஒருமணி நேரத்தில் ரத்த சர்க்கரை அளவை கணக்கிட வேண்டும்.
* 130 மி.கி., மேல் இருந்தால், கர்ப்ப கால ரத்தசர்க்கரை அளவு சர்க்கரை நோய் இருப்பதாக எடுத்துக் கொள்ளலாம்.
* 'ஓரல் ஜி.டி.டி.' குளுக்கோஸ் தாங்கும் பரிசோதனை செய்வதன் மூலமும் கர்ப்ப கால சர்க்கரை நோயை அறியலாம்.
பாதிக்கப்பட்ட தாய்மார்கள் ஊட்டச்சத்து உள்ள உணவுகளை உட்கொள்ள வேண்டும். புரதச்சத்து அதிகமாகவும், கொழுப்புச்சத்து குறைவாகவும் உள்ள உணவையும் உட்கொள்ள வேண்டும்.
காய்கறிகள், கீரைகள் அதிகமாக எடுத்துக்கொண்டால் கர்ப்ப காலத்தில் மலச்சிக்கல் வராது.
பால், பாதாம் பருப்பு, முட்டையின் வெள்ளைக்கரு மிகச்சிறந்த உணவாகும். எளிதில் செரிக்கக்கூடிய உணவுகளை எடுத்துக்கொள்வது வயிற்று பிரச்னை வராமல் பாதுகாக்கும்.
முதல் மூன்று மாதங்களில் ஏற்படும் வாந்தியால் தகுந்த உணவுகள் எடுக்க முடியாமல் போகலாம். அப்போது சர்க்கரை குறை நிலை ஏற்படாமல் இருக்க பழச்சாறு, கஞ்சி போன்ற உணவு வகைகளை எடுத்துக்கொள்ளலாம்.
எப்படி சாப்பிட வேண்டும்?
1. வயிறு நிறைய சாப்பிடாமல் மூன்று வேளை சாப்பிடுவதற்கு பதிலாக அளவு குறைவாக 5 வேளை அல்லது 6 வேளை சாப்பிடலாம்.
2. பட்டினியாக கர்ப்ப கால சர்க்கரை நோயாளிகள் இருந்தால் சர்க்கரை அளவு குறையும் என்பதால் கவனமாக இருக்க வேண்டும். முக்கியமாக இரவு உணவு எடுக்காமல் இருக்கக்கூடாது.
3. இனிப்பு சுவைக்காக செயற்கை சர்க்கரையை பயன்படுத்தக்கூடாது. அதில் உள்ள வேதிப்பொருள் குழந்தையை பாதிக்கலாம்.
டாக்டர் சுஜாதா சங்குமணி
மகப்பேறு நிபுணர்மதுரை,
போன் : 0452- 267 5411
நன்றி : தினமலர் நாளிதழ் - 31.10.2016



Saturday, October 29, 2016

ஆயுள் தண்டனை கைதிகள்


ஆயுள் தண்டனை கைதிகள் - என்ன செய்ய வேண்டும்?

ஆயுள் தண்டனைக் கைதி ஒருவர் 17 ஆண்டுகளாக சிறை வாசம் அனுபவித்து வருவதால் தன்னை விடுவிக்கக் கோரி தொடர்ந்த வழக்கில் அவரே வாதாடி வெற்றி பெற்றார். 

இதனால், தமிழக சிறையில் 10 ஆண்டுகளுக்கு மேலாக தண்டனை அனுபவித்து வரும் ஆயுள் கைதிகள் முன்கூட்டியே விடுதலையாகும் வாய்ப்பும் ஏற்பட்டுள்ளது.

விருதுநகர் மாவட்டம், அருப்புக்கோட்டையில் 1999-ம் ஆண்டு 16 வயது பள்ளி மாணவி பலாத் காரம் செய்யப்பட்டு கொலை செய்யப்பட்ட வழக்கில் பொறியாளர் பி.வீரபாரதி(44) என்பவருக்கு விருதுநகர் நீதிமன்றம் தூக்குத் தண்டனை வழங்கியது. 

மேல் முறையீட்டில் வீரபாரதிக்கு விதிக்கப்பட்ட தூக்குத் தண்டனை ஆயுள் தண்டனையாகக் குறைக்கப் பட்டது. 

தற்போது அவர் பாளை சிறையில் அடைக்கப்பட்டுள்ளார்.
இந்நிலையில், 17 ஆண்டுகள் சிறைவாசம் முடித்துவிட்டதால் தன்னை முன்கூட்டியே விடுதலை செய்யக்கோரி தமிழக அரசுக்கு மனு அனுப்பினார். 

இது நிராகரிக்கப்பட்டதால் உயர்நீதிமன்ற கிளையில் ஆட்கொணர்வு மனு தாக்கல் செய்தார். 

இந்த மனு முதல் அமர்வில் விசாரணைக்கு வந்தது. இந்த வழக்கில் வீரபாரதி தனக்காக வழக்கறிஞர் வைத்துக்கொள்ளாமல் அவரே வாதாடினார்.

இந்த வழக்கில் நீதிபதிகள் பிறப் பித்த உத்தரவு:
தமிழ்நாடு சிறை விதி 341(3)-ல் 3 ஆண்டுகளுக்கு மேல் சிறை வாசம் அனுபவித்த ஆயுள் கைதி களை முன்கூட்டியே விடுவிக்க பரிசீலிக்கலாம் என கூறப்பட்டுள்ளது.

 ஆனால், இந்த விதி பாலியல் பாலத்காரம், போர்ஜரி, கொள்ளை, பொருளாதாரக் குற்றங்கள், கடத்தல், உணவு கலப்படம், பயங்கர வாதம் மற்றும் மாநில நலனுக்கு எதிரான குற்றங்களில் தொடர்பு உடையவர்களுக்குப் பொருந்தாது.

ஆனால் விதி 341(2)-ல் ஆயுள் தண்டனை கைதிகளில் 10 ஆண்டுகள் சிறைவாசம் முடித்தவர்களை முன்கூட்டியே விடுதலை செய்ய பரிசீலிக்கலாம் என கூறப்பட்டுள்ளது.

அதே பிரிவில் தூக்குத் தண்டனை விதிக்கப்பட்டு ஆயுள் தண்டனையாகக் குறைக்கப்பட்டவர்களை 14 ஆண்டுகள் சிறைவாசத்துக்குப் பிறகு விடுதலை செய்ய பரிசீலிக்கலாம் என சொல்லப்பட்டுள்ளது.

இருப்பினும் முன்கூட்டியே விடுதலை செய்யக்கோரி ஆயுள் கைதிகள் அனுப்பிய மனுவை விதி 341(3)-ஐ காரணம் காட்டி அதிகாரிகள் நிராகரித்துள்ளனர். 

ஆயுள் கைதிகள் முன்கூட்டியே விடுவிக்கப்பட உரிமை உண்டு என நீதிபதிகள் உத்தரவில் தெரிவித்துள்ளனர்.

வீரபாரதி அளித்த மனுவை நிராகரித்து அரசு பிறப்பித்த உத்தரவை ரத்து செய்தும், மனுதாரரின் மனுவை 8 வாரங்களில் பரிசீலித்து உத்தரவு பிறப்பிக்க வேண்டும் என்றும் உள்துறை செயலருக்கு உத்தரவிட்டனர்.

மேலும், வீரபாரதிபோல் முன்கூட்டியே விடுதலை செய்யக்கோரி மனு அளித்து, அறியாமையால் நீதிமன் றத்தில் வழக்கு தொடராமல் இருக்கும் பிற ஆயுள் கைதிகளின் மனுக்களை நிராகரித்து பிறப்பித்த உத்தரவை உள்துறை செயலர் மறு சீராய்வு செய்ய வேண்டும் என நீதிபதிகள் உத்தரவிட்டனர்.

இந்த வழக்கால் வீரபாரதி மட்டுமின்றி, முன்கூட்டியே விடுதலை செய்யக்கோரி மனு அளித்துள்ள 10 ஆண்டுகளுக்கு மேல் சிறையில் உள்ள பிற ஆயுள் கைதிகளும் விடுதலையாக வாய்ப்பு உள்ளது

நன்றி : தி இந்து தமிழ் நாளிதழ் – 29.10.2016

Friday, October 28, 2016

ஏ.டி.எம்.மில் கள்ள நோட்டு


ஏ.டி.எம்.மில் கள்ள நோட்டு - என்ன செய்ய வேண்டும்?

வீட்டுக்குப் பக்கத்தில் இருக்கும் ஏடிஎம்-ல் பணம் எடுத்து, அருகில் உள்ள மளிகைக் கடையில் பொருட்களை வாங்கிவிட்டு, 500 ரூபாய் பணத்தை நீட்டுகிறீர்கள்.
‘சார், இது கள்ள நோட்டு, செல்லாது. வேறு நோட்டைக் கொடுங்க!’ என்று கடைக்காரர் கேட்டதும் உங்களுக்குப் பகீரென்கிறது.
சில சமயங்களில் வங்கியிலிருந்து நாம் வாங்கிவரும் பணம்கூட கள்ள நோட்டு என்று சில இடங்களில் வாங்க மறுத்துவிடுகிறார்கள்.
இது மாதிரி கள்ள நோட்டு உங்களிடம் வந்து சேர்ந்தால், என்ன செய்யவேண்டும், யாரிடம் புகார் தர வேண்டும் என தனியார் வங்கி அதிகாரி விஜயகுமாரிடம் விசாரித்தோம்.
ஏடிஎம்-ல் கள்ள நோட்டு!
“ஏடிஎம் அல்லது வங்கியில் கள்ள நோட்டுகள் வருவதற்கு இப்போது வாய்ப்புக் குறைவு. பொதுவாக, அனைத்து வங்கிகளும் ஏடிஎம்-ன் மூலம் விநியோகிக்கவேண்டிய பணத்தை, குறிப்பிட்ட வங்கியின் கருவூலம் மூலமே அனுப்பி வைப்பார்கள்.
இந்தக் கருவூலத்தில் அழுக்கடைந்த, கிழிந்த மற்றும் கள்ள நோட்டுகள் அனைத்தும் ஆராயப்படுகின்றன. இந்தக் கருவூலத்திலேயே கள்ள நோட்டுகளை ஆராய்வதற்காக சாதனங்களும் உள்ளன.
ஏடிஎம்-க்கு அனுப்பப்படும் அனைத்து ரூபாய் நோட்டுகளும் முழுவதுமாக சோதனை செய்த பின்பே அனுப்பப்படும். ஆகையால், ஏடிஎம்-ல் கள்ள நோட்டுகள் கிடைப்பதற்கு வாய்ப்புகள் மிகக் குறைவு” என்றவர், வங்கி வாடிக்கையாளர்கள் கவனிக்கவேண்டிய விஷயங்கள் குறித்து விளக்கிச் சொன்னார்.
கள்ள நோட்டுக்குச் சீல்!
ஏடிஎம்-ல் கள்ள நோட்டுகள் கிடைத்தால், கீழ்க்கண்ட வழிமுறைகளை வாடிக்கையாளர்கள் பின்பற்ற வேண்டியது அவசியம்.
* வாடிக்கையாளர்கள் முதலில் எது கள்ள நோட்டு, எது நல்ல நோட்டு என்பதை நன்கு தெரிந்துவைத்திருக்க வேண்டும்.
* ஏடிஎம்-ல் கள்ள நோட்டுகள் கிடைத்தால், எந்த ஏடிஎம்-ல் பணம் எடுக்கப்பட்டதோ, அதன் அருகிலுள்ள அந்த வங்கிக்குச் செல்லவேண்டும். வாடிக்கையாளர் மூலம் கள்ள நோட்டுகள் வங்கிகளுக்கு வந்தால், அந்தப் பணத்தை முதலில் பரிசோதித்து அது கள்ள நோட்டாக இருக்கும் பட்சத்தில், ‘கள்ள நோட்டு’ என்று பணத்தின் மீது சீல் வைக்கப்படும். அதன்பின் வாடிக்கையாளரின் முகவரி மற்றும் அடையாளச் சான்றை வாங்கி, அவரிடம் கையெழுத்து வாங்கப்படும்.
* ஒவ்வொரு வங்கியிலும் கள்ள நோட்டுக்கு என்றே தனி பதிவேடு, ஒன்று வங்கி மேலாளரிடம் இருக்கும். அதில் வாடிக்கையாளர் கொண்டுவந்த கள்ள நோட்டு குறித்த விவரம் பதிவு செய்யப்படும். மீண்டும் வாடிக்கையாளருக்கு அந்தக் கள்ள நோட்டு திரும்ப வழங்கப்பட மாட்டாது. ஏடிஎம்-ல் எடுத்த கள்ள நோட்டுக்குப் பதிலாக வேறு ரூபாய் நோட்டு வழங்கப்படும்.
* இறுதியாக, வங்கியாளர்கள், வாடிக்கையாளர் வழங்கியதில் 3, 4 கள்ள நோட்டுகள் இருந்தால், அது குறித்த விவரங்களை போலீஸ் ஸ்டேஷனில் தெரியப்படுத்தி, எஃப்ஐஆர் பதிவு செய்வார்கள்.
அதே சமயம், வாடிக்கையாளர் ஏடிஎம்-லிருந்து கள்ள நோட்டை எடுத்திருந்தால் அதை வங்கிகளில் நிரூபிக்கவேண்டும்.
கள்ள நோட்டு தொடர்பாக ஒருவேளை வங்கி அதிகாரிகள் உங்களுக்கு முறையான பதிலை அளிக்கவில்லை; கள்ள நோட்டுக்குப் பதில் வேறு பணத்தை வழங்கவில்லை எனில், காவல் நிலையத்தில் அது குறித்து நீங்கள் புகார் செய்யலாம்.
ஏடிஎம் ரிஜிஸ்டரில் புகார்!
இதுவே, வாடிக்கையாளர்கள் இரவு நேரத்தில் ஏடிஎம்-ல் பணம் எடுக்கச் சென்று அதில் கள்ள நோட்டுகள் இருந்தால், அங்குள்ள ஏடிஎம் காவலரிடம் இதுகுறித்த தகவல்களைத் தெரிவித்துவிட்டு, சிசிடிவி கேமரா முன் ஏடிஎம் ரிஜிஸ்டரில் உங்களுக்குக் கள்ள நோட்டுகள் கிடைத்துள்ளதாக அந்தப் புத்தகத்தில் புகார் செய்யவேண்டும்.
அதன்பின் அருகிலுள்ள போலீஸ் ஸ்டேஷன் சென்று, ஏடிஎம்-ல் கள்ள நோட்டு கிடைத்ததாக எஃப்ஐஆர் பதிவு செய்யவேண்டும்.
இந்தப் புகாரின் அடிப்படையில் போலீஸார் விசாரணை மேற்கொள்வார்கள். விசாரணையில் வங்கித் தரப்பில் தவறு இருந்தால், உங்களுடைய பணம் திருப்பி வழங்கப்படும்.
வங்கியில் கள்ள நோட்டுகள் வந்தால்..!
வங்கி கவுன்டர்களில் கள்ள நோட்டுகள் வருவதற்கும், வாடிக்கையாளர்களுக்குக் கிடைப்பதற்கும் வாய்ப்புகள் உள்ளன.
உதாரணத்துக்கு, வாடிக்கையாளர் ஒருவர் 10,000 ரூபாயை கவுன்டரில் செலுத்திவிட்டு, அதில் ஒரு சில நோட்டுகள், கள்ள நோட்டாக இருக்கும் பட்சத்தில், வங்கியாளர் அந்தப் பணத்தை பரிசோதிக்காமல், அந்தப் பணத்தை மற்ற ஒரு வாடிக்கையாளருக்கு வழங்கும்போது கள்ள நோட்டுகள் கிடைக்க வாய்ப்புள்ளது.
வங்கியில் இருந்து கள்ள நோட்டுகளை வாங்கி இருந்தால், அதற்கு ஆதாரம் வழங்கினால், அதற்கு உண்டான பணம் திரும்ப வழங்கப்படும்.
ஆர்பிஐ விதிமுறை!
வங்கிகள் தரப்பில் தவறு இருந்தால், அந்தப் பணம் வாடிக்கையாளருக்கு உடனடியாக கிடைக்கும். இல்லையெனில் வாடிக்கையாளருக்குக் கள்ள நோட்டுக்குப் பதில் வேறு பணம் கிடைக்காது.
ஆனால், ஏடிஎம் அல்லது வங்கிகளைத் தவிர, வேறு ஒரு ஏதாவது இடத்தில் கள்ள நோட்டுகள் ஒருவருக்குக் கிடைத்தால், அவர் அந்தப் பணத்தை இழந்ததற்குச் சமம்.
ஆர்பிஐ விதிமுறைகளின்படி, ஒன்றிரண்டு கள்ள நோட்டுகளை விவரம் தெரியாமல் வைத்து இருப்பது என்பது பெரும் குற்றமில்லை;
ஆனால், கள்ள நோட்டை வைத்துக்கொண்டு மற்றவரை ஏமாற்றவேண்டும் என்ற நோக்கத்தில் அதை விநியோகிக்கக்கூடாது. அப்படி விநியோகித்தால், அது சட்டப்படி தவறு.
அந்த வாடிக்கையாளரைக் கைது செய்து நடவடிக்கை எடுக்கவும் அதிகாரம் உண்டு’’ என்கிற எச்சரிக்கையுடன் முடித்தார்.
இனியாவது உங்களிடம் வரும் 500, 1,000 ரூபாய் நோட்டுக்கள் நல்ல நோட்டுகள்தானா என்பதைப் பரிசோதித்து வாங்குங்கள்!
நன்றி : நாணயம் விகடன் - 30.10.2016



Wednesday, October 26, 2016

ஒரே கிளிக்கில் ஓவர் டிராப்ட் கடன்


ஒரே கிளிக்கில் ஓவர் டிராப்ட் கடன் - என்ன செய்ய வேண்டும்?

ஒரே க்ளிக்கில் ஓவர் டிராப்ட் கடன்… வாங்கலாமா, கூடாதா?

அவசரத் தேவைக்கு சிலர் வங்கியில் சம்பள ஓவர் டிராப்ட் கடன் வாங்குவார்கள். இந்த வாடிக்கையாளர்களைக் குறிவைத்து தனியார் நிறுவனங்கள் உடனடிக் கடன் வழங்க ஆரம்பித்திருக்கின்றன. 

முதல் முறையாகக் கடன் வாங்கும்போது ஐந்தே நிமிடங்களில் தரப்படும் இந்தக் கடன், இரண்டாவது முறையிலிருந்து ஒரு சில நொடிகளில் கடன் வசதி என அறிவிப்பை வெளியிட்டு சம்பளதாரர்களை கிறங்கடிக்கின்றன.

உடனடிக் கடன்!

மாதச் சம்பளம் வாங்கும் வாடிக்கையாளரைக் குறி வைத்து, அவர்களுடைய அவசரத் தேவைக்கு பணம் வழங்குவதே இது போன்ற நிறுவனங்களின்  நோக்கம். வாடிக்கையாளர் வாங்கும் கடனுக்கு மாதம் 1.8-2%. வட்டி. 

முதன் முறையாகக் கடன் வாங்கும்போது பரிசீலனைக் கட்டணம் ரூ.250-300, 

இரண்டாவது முறையிலிருந்து ரூ.150 வசூலிக்கப்படுகிறது. 

அதிகபட்சமாக ரூ.5 லட்சம் வரை இந்தக் கடன் வழங்கப்படுகிறது. 

சராசரியாக ரூ.50,000 கடன் வழங்கப்படுகிறது.

இந்த நிறுவனங்கள் வழங்கும் கடன் வசதியில் என்ன விசேஷம் எனில், அவசர பணத் தேவைக்காக அலையத் தேவையில்லை. நண்பர்களிடமோ, உறவினர்களிடமோ கடன் கேட்டு தர்மசங்கடத்தை உருவாக்க வேண்டியதில்லை. இந்த நிறுவனங்களின் ஆப் மூலம் உடனடியாகவும், எளிதாகவும் கடன் கிடைக்கும். 

ஆனால், இதுபோன்ற நிறுவனங்களை நம்பலாமா? இதன் சாதகம், பாதகம் குறித்து நிதி ஆலோசகர் முத்துக்கிருஷ்ணனிடம் கேட்டோம். விளக்கமாக எடுத்துச் சொன்னார்.

அதிக வட்டி!

“இதுபோன்ற நிறுவனங்கள் வழங்கும் கடன் சேவையில் சாதகமான விஷயங்களைவிட, பாதகமான விஷயங்களே அதிகமாக உள்ளன. ஏனெனில் இந்த நிறுவனத்தில் குறைந்தபட்சம் வட்டியே மாதத்துக்கு 2% என்று குறிப்பிடப்பட்டுள்ளது. ஆகையால் வருடத்துக்கு 24% வட்டி கட்டவேண்டும். 

வங்கிகளில் சம்பள ஓவர் டிராப்டுக்கு அதிகபட்சமாக 16%  என்றளவில்தான் கடன் வழங்குகிறார்கள். ஆகையால், இவ்வளவு அதிக வட்டிக்கு இதுபோன்ற கடனை வாங்கத் தேவையில்லை. உதாரணத்துக்கு, இதில் 10,000 ரூபாய்க்குக் கடன் வாங்குகிறோம் எனில், ரூ.150 பரிசீலனைக் கட்டணமாக வசூலிக்கப்படுகிறது. இதுவே கடனில் 1.5% ஆகும். 

இது தவிர ஒவ்வொரு மாதமும் 2 சதவிகித வட்டி செலுத்தவேண்டும்.

சிபில் ஸ்கோர் பாதிக்கும்!

இந்தக் கடனுக்கு ஒவ்வொரு முறையும் பரிசீலனைக் கட்டணம் வசூலிக்கப்படுகிறது. இந்தக் கடன் சுலபமாகக் கிடைப்பதால், இது நாளடைவில் நமக்குப் பழகிவிடும். கடன் வாங்குவது எளிதாக இருப்பதால், வாடிக்கை யாளருக்கும் அடிக்கடி இந்தக் கடனை வாங்கி, எப்போதும் வட்டி கட்டும் நிலை ஏற்படும்.

இதுபோன்ற கடனை அடிக்கடி வாங்கினாலோ, திரும்பச் செலுத்தாமல் இருந்தாலோ, வாடிக்கை யாளர்களுடைய சிபில் ஸ்கோர் குறைய வாய்ப்புண்டு. ஏனெனில் சிபில் ஸ்கோரைப் பொறுத்தவரை அடிக்கடி கடன் வாங்கினாலே அது தவறாக எடுத்துக் கொள்ளப்படுகிறது.

இதுபோன்ற நிறுவனங்கள் மூலம் ஆயிரம், இரண்டாயிரத்துக்குக் கடன் வாங்கி, அதன்பின் முறையாகக் கடனைத் திருப்பிச் செலுத்தாமல் இருந்தால்கூட, எதிர்காலத்தில் வீட்டுக் கடனுக்கோ அல்லது அவசரத் தேவைக்கோ வங்கிகள் கடன் வாங்கும்போது கடன் கிடைக்காமல் போகலாம்.

இந்தக் கடனை வாங்கியபின் திரும்பச் செலுத்தாவிட்டால் அல்லது காலதாமதம் ஏற்பட்டால் எந்த மாதிரியான நடவடிக்கையை மேற் கொள்வார்கள் என்பது தெரியவில்லை. வாடிக்கையாளரைக் கைது செய்வார்களா அல்லது அலுவலகத்துக்கே வந்து மிரட்டல் விடுப்பார்களா என்பது போன்ற விவரங்களும் தெரியாது. 

இதுபோன்ற நிறுவனங்கள் ஆர்.பி.ஐ வரம்புக்கு உட்பட்டதாகவும் தெரிய வில்லை. ஆகையால், இந்த இணையதளம் மூலம் அவசரத் தேவைக்கு வேண்டுமானால் கடன் வாங்கலாம். ஆனால், தேவையில்லாத செலவுக்கு கடன் வாங்காமல் இருப்பதே சிறந்தது” என்றார்.

மாதச் சம்பளம் வாங்குபவர்களுக்கு நிதிச் சிக்கல் தொடர்ந்து இருந்தாலும், எளிதில் கிடைக்கிறது என்பதற்காக இதுபோன்ற நிறுவனங்களின் வலையில் சிக்காமல் இருப்பதே நல்லது. உடனே திரும்பக் கட்டிவிட முடியும் என்கிற நம்பிக்கையில், அவசரத் தேவைக்கு மட்டுமே இதனைப் பயன்படுத்தலாம்.

சோ.கார்த்திகேயன்
நன்றி – நாணயம் விகடன் – 30.10.2016

பிரதமர் அலுவலகத்தை தொடர்பு கொள்ள


பிரதமர் அலுவலகத்தை தொடர்பு கொள்ள என்ன செய்ய வேண்டும்?

நமது உரிமை

நாட்டின் பிரதமர் அலுவலகத்தையும் பிரதமரையும் தொடர்பு கொள்வது எப்படி என்ற தகவல் நாட்டுக் குடிமக்கள் ஒவ்வொருவருக்கும் அவசியமாக தெரிந்திருக்க வேண்டிய ஒன்று .

நமது தேவைகளையும் உரிமைகளையும் பெற்றுக்கொள்வது எப்படி சட்டப்படி உரிமையோ அதை பயன்படுத்தி நாம் பிரதமரை அல்லது அவர் அலுவலகத்தை தொடர்பு கொண்டு தேவையானதை பெற்றுக் கொள்ள முடியும்.

பிரதமர் அலுவலகத்தை பொதுமக்கள் தொடர்பு கொள்ள பல்வேறு வழிகள் உள்ளது. கடிதம், பேக்ஸ், இ.மெயில். பேஸ்புக், டுவிட்டர், வெப்சைட் மற்றும் மொபைல் மூலம் நாட்டு குடிமக்கள் ஒவ்வொருவரும் பிரதமர் அலுவலகத்தை தொடர்பு கொள்ள முடியும்.

அப்படி தொடர்பு கொள்வதால் எந்தவிதமான சட்ட நடவடிக்கையும் எடுக்க முடியாது. மக்களை ஆட்சி செய்பவர், மக்களின் தேவைகளை பூர்த்தி செய்ய வேண்டும் என்பதற்காகத்தான் இந்த வசதியை அரசயலமைப்புச் சட்டம் வழங்கியுள்ளது.

கடிதம்

பிரச்னை உள்ள மக்கள் அதன் தீர்வுக்காக பிரதமர் அலுவலகத்திற்கு கடிதம் எழுத முடியும் அந்தக் கடிதம் அலுவலகத்தைச் சென்றடைவதுடன் அதில் பணியாற்றும் ஊழியர்கள் படித்து அதிகாரிகள் மட்டத்தில் கேட்க வேண்டிய விஷயமாக இருந்தால் அவர்களே அதற்கு தீர்வு காண்பார்கள்.

தவிர்க்க முடியாமல் பிரதமர்தான் அதைப் பார்க்க வேண்டும் என்று விருப்பப்பட்டால்,. பிரதமரின் கவனத்திற்கு கொண்டு செல்வார்கள். பிரதமருக்கு கடிதம் எழுத விரும்பினால்,

Prime minister office,
south Block,
raisina hil,
New delhi, 110001 ( India ),
Phone num - 91-1123012312 .
பேக்ஸ் - 91-11-23019545, 23016857.

இணையம் :
நமது பிரதமர் நரேந்திரமோடி அவருக்காக உருவாக்கப்பட்டுள்ள அங்கீகரிக்கப்பட்ட இணையதளம் மூலம் மக்களோடு தொடர்பு கொண்டு பேசும் பழக்கத்தை கொண்டுள்ளார். இணைய தளத்தின் மூலம் முதல்முறை கவனத்திற்கு யார் தகவல் கொடுத்தாலும் சமயம் கிடைக்கும்போது அதைப் பயன்படுத்தி பேசுவார். அதன்படி பிரதமரின் இணையதளத்தை பயன்படுத்த விரும்புவோம் https://www.pmindia.gov.in/en/interact-with-honble-pm மற்றும் www.narendramodi.in ஆகிய இணையதள முகவரி மூலம் தொடர்பு கொள்ளலாம் அல்லது நேரடியாக அரசாங்க இணையதளத்தில் தொடர்பு கொள்ள விரும்புவோர் https://mygov.nic.in/signup லாகின் செய்ய வேண்டும்.

பிரதமர் அலுவலகத்தை தொடர்பு கொள்ள முடியும் ஒரு வேளை இணையதளத்தில் ஏதாவது தொழில்நுட்ப பிரச்னை இருந்தால்

web Information manager,
south Block,
raisina hil,
New delhi, 110001 ( India ),
Phone num - 91-1123012312 .
பேக்ஸ் - 91-11-23019545, 23016857.

இதைத்தவிர பிரதமரை பணம் செலவு செய்து தொடர்பு கொண்டு பேச முடியாதவர்கள், மிஸ்டுகால் கொடுத்து அல்லது எஸ்.எம்.எஸ். மூலம் தொடர்பு கொள்ளும் வசதி கடந்த 2015ம் ஆண்டு மூலம் அறிமுகம் செய்யப்பட்டுள்ளது. அதன்படி 011-3006 3006 என்ற எண்ணில் தொடர்பு கொள்ளலாம்.

சமூக வலைத்தலங்கள்

நாட்டில் இதற்கு முன் இருந்த எந்த பிரதமரும் செயல்படுத்தாத வகையில் பிரதமர் நரேந்திர மோடி சமூக வலைத்தலங்கள் மூலம் பொதுமக்களின் பிரச்னைகளுக்கு தீர்வு காணும் வசதியை அறிமுகம் செய்துள்ளார். அதன்படி
https://facebook.com/pmoindia மற்றும் https://www.facebook.com/narendramodi
இதன்மூலம் தொடர்பு கொள்ளலாம். மேலும் டுவிட்டர் மூலம் தொடர்பு கொள்ள விரும்புவோர் https://twitter.com/PMOIndia மற்றும் http://twitter.com/narendramodi
இதன்மூலம் தொடர்பு கொள்ளலாம்.

* https:/www.youtube.com/user/narendramodi/abouut.
* http://www/weibo/com/u/5581682776,
* https://wwwin/linkedin/com/narendramodi/
* https://wwwin/instagram/com/narendramodi/
* narendramodi1234@gmail.com

இதனிடையில் சமீபத்தில் பிரதமரை பொதுமக்கள் எந்த சங்கடமும் இல்லாமல் பிரச்னைகளை தீர்த்துக்கொள்ள புதியதாக செயலியை அறிமுகம் செய்துள்ளார். அதன்படி * https://play.google.com/store/apps/details?=com. narendramodiapp&hl=en என்ற லிங்கில் லாகின் செய்ய வேண்டும். மேலும் பிரதமர் வீட்டிற்கு கடிதம் எழுத விரும்புவோர்
honourable prime minister of india.
No-7, racecource road,
teenmurti marg area,
New delhi - 110 011.

மத்திய அமைச்சர்கள்

சுஷ்மா ஸ்வராஜ் - வெளியுறவுத்துறை அமைச்சர்

இ.மெயில் - 2009vidisha@gmail.com

அலுவலக முகவரி

No 8,
safdarjung lane,
New delhi 110 011

சமூக வலைத்தளம்

* https://teitter.com/sushmaswaraj
* https://www.facebook.com/sushmaswarajBJP

சுரேஷ்பிரபு

அலுவலக முகவரி

No 256-A,
railbhavan,
raisnaroad,
Newdelhi-110 011

செல்போன் எண் - 91-11-2338 9155,

இணையதளமுகவரி fora@rb.railnet.gov.in

வீட்டு முகவரி

B-21,
sadhana.
16th Road. ghar-west,
Mumbai -400052
Maharashtra,
India

* https://twitter.com/sureshprabhu/
* https://www.faceboo.com/railministersureshprabhu/

நன்றி : தினகரன் நாளிதழ் – 25.10.2016